Ноябрдан тартып четөлкөлүктөр менен Кыргызстан жарандары үчүн камсыздандыруу төгүмдөрүнүн ставкалары теңделди

Эми иш берүүчүлөр четөлкөлүк жаран жумушчулары үчүн камсыздандыруу төгүмдөрүн Кыргыз Республикасынын жарандары менен бир өлчөмдө төлөшөт. Камсыздандыруу төгүмдөрүн жаңы тартипте эсептөө жана төлөө 2022-жылдын ноябрынан башталып, 2022-жылдын декабрь айында тапшырылуучу отчеттордо көрсөтүлөт.

Четөлкөлүк жарандардын камсыздандыруу төгүмдөрүнүн көлөмү ар бир уюмдун камсыздандыруу төгүмдөрүнүн тарифине туура келиши керек.

Чет өлкөлүк жарандар үчүн камсыздандыруу төгүмдөрүнүн тарифтери Кыргыз Республикасынын 2021-жылдын 15-ноябрындагы № 132 Мыйзамы менен өзгөртүлгөн.

Буга чейин Кыргызстанда убактылуу жүргөн жана иштеген чет өлкөлүк жарандар үчүн иш берүүчүлөр пенсиялык фонддун тилектештик бөлүгүнө 3 % төлөп келишкен.

Жарандык-укуктук келишимдер (контракттар) боюнча киреше алуучу, ошондой эле жеке ишкерлик менен алектенишкен, анын ичинде базарларда иштеген чет өлкөлүк жарандар жана жарандыгы жок адамдар камсыздандыруу төгүмдөрүн эсептөөнү жана төлөөнү, эгерде Кыргыз Республикасынын мыйзамдарына ылайык күчүнө кирген эл аралык келишимдерде башкача каралбаса мамлекеттик социалдык камсыздандыруу боюнча мыйзамда белгиленген, Кыргыз Республикасынын жарандары үчүн камсыздандыруу төгүмдөрүнүн тарифтеринин ставкалары боюнча өз алдынча жүзөгө ашырат.