Жеке ишкерлер 1-январдан тартып салык салуунун жөнөкөйлөтүлгөн системасы менен иштей алышат

Товарларды сатуу, жумуштарды аткаруу жана калкка кызмат көрсөтүү боюнча иш жүргүзгөн жеке ишкерлер 2021-жылдын 1-январынан тартып чекене сатуулардан салыктын негизинде салык салуунун жөнөкөйлөтүлгөн системасы боюнча иштей алышат. Бул тууралуу Бишкек шаарында 17-декабрда "Бизнес үчүн салыктык башкаруу чөйрөсүндөгү жаңылануулар" темасында өткөрүлгөн тегерек столдо кабарланды.

Салык салуунун жөнөкөйлөтүлгөн системасы боюнча иштөө үчүн жеке ишкерлердин иши бир катар талаптарга жооп берүүгө тийиш. Атап айтканда, чекене сатуу салыгын төлөөчүлөрү үчүн ККМ-онлайн милдеттүү түрдө колдонулат жана алар КНС төлөөчүсү болбоого же соңку 12 айдын ичинде кирешесинин көлөмү КНС боюнча каттоо чегинин өлчөмүнөн (8 млн сом) ашпоого тийиш.

Чекене сатуу салыгын ставкасы биринчи жылында "нөлдүк" көрсөткүч менен, экинчи жылы – 1%, үчүнчү жылы – 2% жана төртүнчү жылдан тартып 3% белгиленген. Накталай эмес формада төлөөдө салыктын ставкасы 50 пайызга азаят.

Бул салык режиминин артыкчылыктары болуп ишмердиктин каалаган мезгилинде бул режимге өтүүнүн ыктыярдуу тартиби; ККМ-онлайндан алынган маалыматтар боюнча салык милдеттенмелери автоматтык түрдө түзүлгөндүгүнө байланыштуу салык декларациясынан тышкары салык отчетторун берүү зарылчылыгынын жоктугу; бухгалтердик эсеп жүргүзүү зарылдыгынын жоктугу жана салыкты мобилдик тиркемелер аркылуу оңой төлөө саналат.

Булак: www.sti.gov.kg